អង្គការសហប្រជាជាតិ


១- ទិដ្ឋភាពទូទៅ

ក្រោយសោកនាដកម្ម នៃសង្រ្គាមលោកលើកទី១ និងទី២ អង្គការសហប្រជាជាតិត្រូវបានបង្កើតឡើងនៅក្នុងឆ្នាំ១៩៤៥ ក្នុងគោលបំណងស្តារឡើងវិញ និងរក្សានូវសន្តិភាព និងសន្តិសុខអន្តរជាតិ។ គោលបំណង និងគោលការណ៍របស់អង្គការសហប្រជាតិ ត្រូវបានចែងនៅក្នុងមាត្រាទី១ និងទី២ នៃធម្មនុញ្ញរបស់អង្គការសហប្រជាជាតិ។ អង្គការសហប្រជាជាតិគឺជា អង្គការអន្តរជាតិមួយដែលបច្ចុប្បន្នមានប្រទេសសមាជិកចំនួន ១៩៣។ កម្ពុជា បានចូលជាសមាជិកនៃអង្គការនេះ នៅថ្ងៃទី១៤ ខែធ្នូ ឆ្នាំ១៩៥៥។

អស់រយៈកាល ៧០ឆ្នាំមកហើយ ដែលអង្គការសហប្រជាជាតិបានដើរជួរមុខ ជារៀងរាល់ថ្ងៃនៅជុំវិញពិភពលោក ដោយឈរលើសរសរស្តម្ភ៣គឺ បញ្ហាសិទ្ធិមនុស្ស សន្តិភាព និងសន្តិសុខ និងការអភិវឌ្ឃ។ កម្ពុជាផ្តល់សារៈសំខាន់ទៅលើសរសរស្តម្ភទាំងបីនេះ។

អង្គភាពសំខាន់ៗនៃអង្គការសហប្រជាជាតិមានដូចជា មហាសន្និបាត ក្រុមប្រឹក្សាសន្តិសុខ ក្រុមប្រឹក្សាសេដ្ឋកិច្ច និងសង្គម ក្រុមប្រឹក្សាភិបាល តុលាការយុត្តិធម៌អន្តរជាតិ និងអគ្គលេខាធិការអង្គការសហប្រជាជាតិ។

 

មហាសន្និបាត នៃអង្គការសហប្រជាជាតិមានគណៈកម្មាធិការចម្បង ដូចតទៅ៖

 

 គណៈកម្មាធិការទី១៖ (ពិភាក្សាលើបញ្ហាការកាត់បន្ថយអាវុធ និងសន្តិសុខអន្តរជាតិ)

 គណៈកម្មាធិការទី២៖ (ពិភាក្សាលើបញ្ហាសេដ្ឋកិច្ច និងហិរញ្ញវត្ថុ)

 គណៈកម្មាធិការទី៣៖ (ពិភាក្សាលើបញ្ហាសង្គម មនុស្សធម៌ និងវប្បធម៌)

 គណៈកម្មាធិការទី៤៖ (ពិភាក្សាលើបញ្ហានយោបាយពិសេស និងការទាមទារឯករាជ្យ)

 គណៈកម្មាធិការទី៥៖ (ពិភាក្សាលើបញ្ហាការងាររដ្ឋបាល និងថវិកា)

 គណៈកម្មាធិការទី៦៖ (ពិភាក្សាលើបញ្ហាគតិយុត្ត)

 

ក្រៅពីលើកកម្ពស់របៀបវារៈអភិវឌ្ឍន៍ អង្គការសហប្រជាជាតិគឺជាកំលាំងសាមគ្គីភាពក្នុងការដោះស្រាយបញ្ហាប្រឈមផ្សេងៗដែលយើងជួបប្រទះ ដើម្បីជាប្រយោជន៍រួមរបស់មនុស្សលោក ជាពិសេសជនក្រីក្រ និងជនងាយរងគ្រោះ។

លោក អាន់តូនីញ៉ូ ហ្គូទែរ៉េស ជាអគ្គលេខាធិការទី៩ នៃអង្គការសហប្រជាជាតិ ដែលកំពុងកាន់តំណែងរយៈពេល៥ឆ្នាំចាប់ពីថ្ងៃទី០១ ខែមករា ឆ្នាំ២០១៧។

 

 

 

ការប្តេជ្ញារបស់កម្ពុជាចំពោះអង្គការសហប្រជាជាតិ

 

កម្ពុជាផ្តល់សារៈសំខាន់លើទំនាក់ទំនងពហុភាគីតាមរយៈក្របខ័ណ្ឌនៃអង្គការតំបន់ និងអង្គការអន្តរជាតិដែលប្រកាន់ខ្ជាប់គោលការណ៍មិនជ្រៀតជ្រែកផ្ទៃក្នុង។

កម្ពុជាផ្តល់សារៈសំខាន់ចំពោះ ការអនុវត្តន៍ប្រកបដោយប្រសិទ្ធិភាព នៃគោលដៅអភិវឌ្ឍដោយចីរភាពដែលអនុម័តដោយអង្គការសហប្រជាជាតិ នៅថ្ងៃទី២៥ ខែកញ្ញា ឆ្នាំ២០១៥ ជាមួយនឹងគោដៅ បញ្ឈប់ភាពក្រីក្រ ការពារភពផែនដី និងធានាវិបុលភាពសម្រាប់ទាំងអស់គ្នា ដែលជាផ្នែកថ្មីមួយនៃរបៀបវារៈអភិវឌ្ឍន៍ដោយចីរភាព។  កម្ពុជាចាត់ទុករបៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាពជាពេលវេលាប្រវត្ដិសាស្ដ្រមួយសម្រាប់រាជរដ្ឋាភិបាលកម្ពុជា និងប្រជាជនទាំងមូលព្រោះថា ប្រធានបទនេះបានបញ្ជាក់យ៉ាងច្បាស់ថាមិនទុកនរណាម្នាក់ចោលនោះឡើយ។

​កម្ពុជាទទួលស្គាល់ថា គោលដៅអភិវឌ្ឍន៍ប្រកបដោយចីរភាព (SDGs) រឺហៅខ្លីថាគោលដៅពិភពលោក គឺ     កសាងភាពជោគជ័យបន្តពីគោលដៅការអភិវឌ្ឍសហស្សវត្សរ៍ (MDGs) និងមានគោលបំណងដើម្បីបញ្ឈប់ភាពក្រីក្រគ្រប់បែបយ៉ាង។ កម្ពុជាមានកិត្តិយសសូមប្រកាសដោយមោទនៈភាពអំពីការសម្រេចបាននូវ គោលដៅការអភិវឌ្ឍសហស្សវត្សរ៍ (MDGs) នាពេលកន្លងមក។

សំខាន់ជាងនេះទៅទៀត ដោយកម្ពុជាធ្លាប់បានទទួលកងកម្លាំងថែរក្សាសន្តិភាព ក្នុងអំឡុងពេលអាជ្ញាធរអន្តរកាលនៃប្រទេសកម្ពុជា (UNTAC) នៅឆ្នាំ១៩៩៣ បច្ចុប្បន្នកម្ពុជាបានក្លាយជាប្រទេសបញ្ជូនកងកម្លាំងថែរក្សាសន្តិភាពនៅក្រោមឆ័ត្រអង្គការសហប្រជាតិ ទៅបម្រើនៅក្នុងបណ្តាប្រទេសមានជំលោះមួយចំនួនដូចជា ស៊ូដង់ ស៊ូដង់ខាងត្បូង ឆាដ អាហ្រ្វិកកណ្តាល លីប៊ី ស៊ីប ម៉ាលី និងប្រទេសផ្សេងៗទៀត។ ចាប់ពីឆ្នាំ២០០៦ ដល់ឆ្នាំ២០១៧ កម្ពុជាបានបញ្ជូនកងទ័ពមួកខៀវចំនួន៤៩៨៥នាក់ ទៅបណ្តាប្រទេសទាំងនោះ។

 

នាយកដ្ឋានអង្គការសហប្រជាជាតិ

 

អគ្គនាយកដ្ឋានសហប្រតិបត្តិការអន្តរជាតិ ត្រូវបានបង្កើតឡើងដោយអនុក្រឹត្យលេខ២៧៤ ចុះថ្ងៃទី២៨ ខែធ្នូ ឆ្នាំ២០១៦ ដោយមាននាយកដ្ឋានចំនួន៥ ជាសេនាធិការ។ នាយកដ្ឋានអង្គការសហប្រជាជាតិ គឺជានាយកដ្ឋានមួយ មានមុខងារសម្របសម្រួលកិច្ចការពាក់ព័ន្ធនឹង អង្គការសហប្រជាជាតិ។

នាយកដ្ឋាន ធ្វើការសម្របសម្រួលជាមួយក្រសួង និងស្ថានប័នពាក់ព័ន្ធកម្ពុជាទៅលើបញ្ហាពាក់ព័ន្ធផ្សេងៗ និងជាមួយស្ថានបេសកកម្មកម្ពុជានៅក្រៅប្រទេស ជាពិសេសស្ថានបេសកកម្មអចិន្ត្រៃយ៍កម្ពុជានៅទីក្រុងញូវយ៉ក និងទីក្រុងហ្សឺណែវ។ នាយកដ្ឋាននេះ ធ្វើការយ៉ាងជិតស្និទ្ធជាមួយនឹងក្រុមភ្នាក់ងារអង្គការសហប្រជាជាតិចំនួន ២៥ដែលកំពុងដំណើរការនៅកម្ពុជា ស្របតាមអនុសារណៈយោគយល់គ្នា។

 

កំណើនតួនាទីរបស់កម្ពុជា នៅក្នុងអង្គការសហប្រជាជាតិ

ដើម្បីលើកមុខមាត់របស់ខ្លួននៅលើឆាកអន្តរជាតិ កម្ពុជាត្រៀមខ្លួនរួចជាស្រេចក្នុងការចូលរួមយ៉ាងសកម្មជាមួយអង្គការសហប្រជាជាតិ។

   កម្ពុជាត្រៀមខ្លួនធ្វើជាអនុប្រធានមហាសន្និបាតរបស់អង្គការសហប្រជាជាតិនៃសម័យប្រជុំលើកទី៧៣ សម្រាប់រយៈពេល១​ឆ្នាំ ចាប់ពីខែកញ្ញា ឆ្នាំ២០១៨ ដល់ខែកញ្ញា ឆ្នាំ២០១៩។

   កម្ពុជាគឺជា បេក្ខភាពក្នុងក្រុមប្រឹក្សាសេដ្ឋកិច្ច និងសង្គមអ.ស.ប សម្រាប់ឆ្នាំ២០១៩។

   កម្ពុជាកំពុងបំពេញការងារជាសមាជិកនៃគណៈក្រុមប្រឹក្សាប្រតិបត្តិកម្មវិធីអភិវឌ្ឍន៍អ.ស.បមូលនិធិអ.ស.បសម្រាប់ប្រជាជន និងការិយាល័យអ.ស.បសម្រាប់សេវាកម្មគម្រោង ក្នុងរយៈពេល ៣ឆ្នាំ ចាប់ពីខែមករា ឆ្នាំ២០១៨​ ដល់ខែធ្នូ ឆ្នាំ២០២០។

   កម្ពុជាត្រូវបានជ្រើសរើសជាសមាជិក នៃគណៈកម្មាធិការបេតិកភណ្ឌពិភពលោកក្នុងគ្រាមានជម្លោះប្រដាប់អាវុធជាលើកទី២ ចាប់ពីឆ្នាំ២០១៧ ដល់ ២០២១ នៅទីក្រុងប៉ារីស។