សេចក្តីប្រកាសព័ត៌មាន
- ខែឧសភា 30, 2017
ស្ថានទូតកម្ពុជានៅម៉ាឡេស៊ី អន្តរាគមជួយពលការិនីខ្មែរ៣នាក់
ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានអន្តរាគមដោះស្រាយបញ្ហា និងរៀបចំមាតុភូមិនិវត្តន៍របស់ពលការិនីខ្មែរចំនួន៣នាក់ ដូចខាងក្រោម៖
(១) ពលការិនី ដ.គ អាយុ៤៣ឆ្នាំ មកពីស្រុកស្ទឹងសែន ខេត្តកំពង់ធំ បានទៅម៉ាឡេស៊ី ធ្វើការតាមផ្ទះ កាលពីថ្ងៃទី០៨ ខែកុម្ភៈ ឆ្នាំ២០១៦ តាមរយៈមេខ្យល់។ ដោយសារការងារលំបាកពេក និងនិយោជកមិនបើកប្រាក់ខែឲ្យ ពលការិនីបានទៅស្ថានទូត នៅថ្ងៃទី០៨ ខែមេសា ឆ្នាំ២០១៧ ដើម្បីស្នើស្ថានទូតជួយទាមទារប្រាក់ខែដែលនៅសល់ពីនិយោជក និងជួយនាងឲ្យបានវិលត្រឡប់មកកម្ពុជាវិញ។
ក្រោមកិច្ចអន្តរាគមន៍របស់ស្ថានទូត និយោជករបស់ពលការិនី បានយល់ព្រមប្រគល់ប្រាក់ខែដែលនៅសល់ ជូននាងវិញ នៅថ្ងៃទី២៧ ខែមេសា ឆ្នាំ២០១៧។
(២) ពលការិនី ព.ទ អាយុ ៣៧ឆ្នាំ មកពីស្រុកបាធាយ ខេត្តកំពង់ចាម បានធ្វើដំណើរតាមរថយន្តឆ្លងកាត់ប្រទេសថៃ ចូលទៅប្រទេសម៉ាឡេស៊ីដោយខុសច្បាប់ និងធ្វើការតាមផ្ទះ កាលពីថ្ងៃទី១៥ ខែតុលា ឆ្នាំ២០១៦ តាមរយៈមេខ្យល់។ ដោយពុំចង់ធ្វើការបន្តទៀត នាងបានទៅស្ថានទូត នៅថ្ងៃទី ២១ ខែមីនា ឆ្នាំ២០១៧ ស្នើជួយឲ្យបានវិលត្រឡប់មកកម្ពុជាវិញ។
ស្ថានទូតបានសម្របសម្រួលជាមួយការិយាល័យអន្តោប្រវេសន៍ម៉ាឡេស៊ី ហើយពលការិនីទាំងពីរបានមកដល់អាកាសយានដ្ឋានអន្តរជាតិភ្នំពេញ នៅថ្ងៃទី ២៩ ខែ ឧសភា ឆ្នាំ ២០១៧ វេលាម៉ោង១៧:៣៥នាទី តាមជើងយន្តហោះ MH762 ។
(៣) ពលការិនី ឈ.ចដ អាយុ២០ឆ្នាំ មកពីសង្កាត់ស្ទឹងមានជ័យ រាជធានីភ្នំពេញ បានធ្វើដំណើរតាមរថយន្តឆ្លងកាត់ប្រទេសថៃ ចូលទៅប្រទេសម៉ាឡេស៊ីដោយខុសច្បាប់ និងធ្វើការតាមផ្ទះ កាលពីថ្ងៃទី២៣ ខែកញ្ញា ឆ្នាំ២០១៣ តាមរយៈក្រុមហ៊ុនមួយ (មិនចាំឈ្មោះ) នៅកម្ពុជា។ ដោយការងារលំបាកពេក ពលការិនីបានទៅស្ថានទូត នៅថ្ងៃទី ០៨ ខែឧសភា ឆ្នាំ២០១៧ ដើម្បីស្នើសុំជួយទាមទារប្រាក់ខែដែលនៅសល់ពីនិយោជក និងជួយនាងឲ្យបានវិលត្រឡប់មកកម្ពុជាវិញ។
ក្រោមកិច្ចអន្តរាគមន៍របស់ស្ថានទូត និយោជករបស់ពលការិនី បានទៅស្ថានទូតនៅថ្ងៃទី ១៩ ខែឧសភា ឆ្នាំ ២០១៧ ហើយបានប្រគល់ប្រាក់ខែដែលនៅសល់ និងទិញសំបុត្រយន្តហោះជូននាង។ ពល- ការិនីខាងលើ នឹងមកដល់អាកាសយានដ្ឋានអន្តរជាតិភ្នំពេញ នៅថ្ងៃទី ០២ ខែ មិថុនា ឆ្នាំ ២០១៧ វេលាម៉ោង១៥:៥៥នាទី តាមជើងយន្តហោះ AK534 ។
ភ្នំពេញ, ថ្ងៃទី២៩ ខែ ឧសភា ឆ្នាំ ២០១៧