សេចក្តីប្រកាសព័ត៌មាន
- ខែឧសភា 16, 2017
ស្ថានទូតកម្ពុជានៅម៉ាឡេស៊ី អន្តរាគមជួយពលករ-ពលការិនីខ្មែរ៣នាក់
ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានអន្តរាគមដោះស្រាយបញ្ហា និងរៀបចំមាតុភូមិនិវត្តន៍របស់ពលករ-ពលការិនីខ្មែរចំនួន៣នាក់ ដូចខាងក្រោម៖
(១) ពលករ ស.ប.ឌ អាយុ២៧ឆ្នាំ មកពីស្រុកស្មាច់មានជ័យ ខេត្តកោះកុង បានទៅម៉ាឡេស៊ីខុសច្បាប់ដោយខ្លួនឯង កាលពីថ្ងៃទី០៣ ខែកុម្ភៈ ឆ្នាំ២០១៦។
(២) ពលករ ស.ណ.ស អាយុ២៥ឆ្នាំ មកពីស្រុកទឹកឈូ ខេត្តកំពត បានទៅម៉ាឡេស៊ីខុសច្បាប់ដោយខ្លួនឯង កាលពីថ្ងៃទី២២ ខែសីហា ឆ្នាំ ២០១៦។
ដោយចង់ត្រឡប់មកកម្ពុជាវិញ ពលករទាំង២នាក់ បានស្នើការអន្តរាគមន៍ពីស្ថានទូតនៅថ្ងៃទី០៣ ខែឧសភា ឆ្នាំ២០១៧។ ស្ថានទូតបានសម្របសម្រួលជាមួយការិយាល័យអន្តោប្រវេសន៍ម៉ាឡេស៊ី ដើម្បីអាចរៀបចំមាតុភូមិនិវត្តន៍សម្រាប់ពួកគេ។
ពលករ ស.ប.ឌ និង ស.ណ.ស នឹងមកដល់អាកាសយានដ្ឋានអន្តរជាតិភ្នំពេញ នៅថ្ងៃទី១៣ ខែឧសភា ឆ្នាំ២០១៧ វេលាម៉ោង ០៧:៣៥នាទីព្រឹក តាមជើងយន្តហោះAK536 ។
(៣) ពលការិនី ភ.ស.គ អាយុ៣៥ឆ្នាំ មកពីខេត្តកំពង់ឆ្នាំង បានទៅម៉ាឡេស៊ីដោយខុសច្បាប់ តាមរយៈមេខ្យល់ និងធ្វើការតាមផ្ទះនៅរដ្ឋ Kedah កាលពីថ្ងៃទី០១ ខែមីនា ឆ្នាំ២០១៧ ។ ដោយសារ ការងារលំបាក នាងបានលួចចាកចេញពីផ្ទះនិយោជក ហើយត្រូវបានពលរដ្ឋខ្មែរ-ឥស្លាមម្នាក់ ទទួលឱ្យស្នាក់នៅបណ្តោះអាសន្ន និងនាំទៅស្ថានទូតនៅថ្ងៃទី០៩ ខែមេសា ឆ្នាំ២០១៧ ។
ស្ថានទូតបានសម្របសម្រួលជាមួយការិយាល័យអន្តោប្រវេសន៍ម៉ាឡេស៊ី ដើម្បីអាចរៀបចំមាតុភូមិនិវត្តន៍របស់ពលការិនីមកកម្ពុជាវិញ។
ពលការិនី ភ.ស.គ បានមកដល់អាកាសយានដ្ឋានអន្តរជាតិភ្នំពេញ នៅថ្ងៃទី០៨ ខែឧសភា ឆ្នាំ២០១៧ វេលាម៉ោង១៧:៣៥នាទី តាមជើងយន្តហោះ MH762 ៕
ភ្នំពេញ, ថ្ងៃទី១២ ខែ ឧសភា ឆ្នាំ ២០១៧