សេចក្តីប្រកាសព័ត៌មាន
- ខែឧសភា 23, 2017
ស្ថានទូតកម្ពុជានៅម៉ាឡេស៊ី អន្តរាគមជួយពលការិនីខ្មែរ៨នាក់
ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានអន្តរាគមដោះស្រាយបញ្ហា និងរៀបចំមាតុភូមិនិវត្តន៍របស់ពលការិនីខ្មែរចំនួន៨នាក់ ដូចខាងក្រោម៖
១. គ.ស.ល អាយុ២៥ឆ្នាំ មកពីខេត្តកំពង់ចាម
២. ណ.ច.រ អាយុ២៦ឆ្នាំ មកពីខេត្តកំពង់ចាម
៣. ព.ស.គ អាយុ៣៨ឆ្នាំ មកពីខេត្តកំពង់ចាម
៤. ស.ថ.រ អាយុ២៨ឆ្នាំ មកពីខេត្តក្រចេះ
៥. ច.ស.វ អាយុ៣០ឆ្នាំ មកពីខេត្តក្រចេះ
៦. អ.ស.ម អាយុ២៣ឆ្នាំ មកពីខេត្តកំពត
៧. ស.ច.ន អាយុ៣១ឆ្នាំ មកពីខេត្តកណ្តាល
៨. អ.ខ.ប អាយុ២៨ឆ្នាំ មកពីខណ្ឌទួលគោក រាជធានីភ្នំពេញ ។
ពលការិនី៨នាក់ខាងលើ បានទៅប្រទេសម៉ាឡេស៊ី ធ្វើការជាអ្នកបោសសំអាត កាលពីឆ្នាំ២០១៦ តាមរយៈក្រុមហ៊ុនមួយនៅកម្ពុជា។ ដោយធ្វើការលំបាក និងនិយោជកពុំបើកប្រាក់ខែឲ្យ ទើបពលការិនី២នាក់ក្នុងចំណោម៨នាក់នោះ បានប្តឹងនគរបាលម៉ាឡេស៊ី ហើយនៅថ្ងៃទី០៦ ខែវិច្ឆិកា ឆ្នាំ២០១៦ នគរបាលម៉ាឡេស៊ី បានចាប់ខ្លួននិយោជករបស់ពលការិនីទៅឃុំបណ្តោះអាសន្ន បន្ទាប់មកក៏បានដោះលែងវិញ។ នគរបាលម៉ាឡេស៊ី បាននាំពលការិនីទាំង៨នាក់ ទៅស្នាក់នៅបណ្តោះអាសន្ននៅជំរំការពារស្ត្រីនៅរដ្ឋJohor។
តុលាការធ្លាប់បានកោះហៅនិយោជកនិងពលការិនីទាំង៨នាក់ ផ្តល់ចម្លើយជាច្រើនលើក ហើយមានគម្រោងកាត់ក្តីសារជាថ្មី នៅថ្ងៃទី៣១ ខែឧសភា ឆ្នាំ២០១៧ (ប៉ុន្តែកន្លងមក តែងតែមានការលើកពេលជាច្រើនដង)។ ដោយពុំអាចរង់ចាំបាន ពលការិនីទាំង៨នាក់ បានស្នើយ៉ាងទទូចសុំត្រឡប់មក កម្ពុជាវិញឲ្យបានឆាប់ ហើយទន្ទឹមនឹងនេះ បានស្នើសុំស្ថានទូតសហការជាមួយអាជ្ញាធរម៉ាឡេស៊ី ជួយទាមទារប្រាក់ខែជូនពួកគេផងដែរ។
ស្ថានទូតបានចរចាជាមួយនិយោជក ហើយនិយោជកបានសន្យាថា នឹងផ្តល់ប្រាក់ខែគ្រប់ចំនួន ជូនពលការិនីទាំង៨នាក់។ ស្ថានទូតកំពុងបន្តសហការជាមួយអាជ្ញាធរម៉ាឡេស៊ី តាមដានលើករណីនេះ ហើយនឹងចាត់មន្ត្រីចូលរួមក្នុ្ងងសវនាការតុលាការ។
ពលការិនីទាំង៨នាក់ នឹងមកដល់អាកាសយានដ្ឋានអន្តរជាតិភ្នំពេញ នៅថ្ងៃទី២៤ ខែឧសភា ឆ្នាំ២០១៧ វេលាម៉ោង០៧:៥០នាទីព្រឹក តាមជើងយន្តហោះAK536 ដោយមន្ត្រីស្ថានទូតនឹងជូនដំណើរពួកគេ នៅព្រលានយន្តហោះនៃទីក្រុងគួឡាឡាំពួរ៕
ភ្នំពេញ, ថ្ងៃទី២៣ ខែ ឧសភា ឆ្នាំ ២០១៧