ព័ត៌មានស្ថានតំណាងកម្ពុជានៅក្រៅប្រទេស
- មិថុនា ៣០, ២០១៧
ការជួយអន្តរាគមន៍ពលការិនីខ្មែរដែលមានស្មារតីមិននឹងនរ
ស្ថានទូតព្រះរាជាណាចក្រកម្ពុជាប្រចាំប្រទេសម៉ាឡេស៊ី៖
បន្ទាប់ពីបានទទួលដំណឹង ថា មានពលការិនីខ្មែរ-ឥស្លាម ឈ្មោះ ភិត ទីម៉ះ មានជំងឺសរសៃរប្រសាទ ហើយកំពុងស្នាក់នៅមន្ទីរពេទ្យ Sanai Buluh នៃរដ្ឋ Selangor នៅថ្ងៃទី០៨ ខែមិថុនា ឆ្នាំ២០១៧ ស្ថានទូតបានចាត់មន្ត្រីទៅសួរសុខទុក្ខ និងមន្ទីរពេទ្យបានយល់ព្រមលើកលែងការបង់ថ្លៃព្យាបាល សរុបចំនួន ៨០០០រីងហ្គីត (ប្រមាណ២០០០ដុល្លារអាមេរិក) តាមការស្នើសុំយ៉ាងទទូចរបស់ស្ថានទូត។ នៅថ្ងៃដដែល ស្ថានទូតបានទទួលពលការិនីមកស្នាក់នៅស្ថានទូត។នៅពេលពលការិនីមានស្មារតីនឹងនរ នាងបានជម្រាបជូនស្ថានទូតថា នាងអាយុ៣៦ឆ្នាំ មកពីខេត្តកំពង់ចាម ហើយត្រូវបានមេខ្យល់នាំជិះរថយន្តកាត់តាមព្រំដែនថៃមកម៉ាឡេស៊ីខុសច្បាប់ ធ្វើការងារតាមផ្ទះ (មិនចាំអាស័យដ្ឋាន) ពីឆ្នាំ២០១៦។
ដោយឈឺក្បាលមិនដឹងមូលហេតុ ក៏ដើរចេញពីផ្ទះនិយោជក ហើយត្រូវនគរបាលម៉ាឡេស៊ីនាំមកមន្ទីរពេទ្យព្យាបាលអស់រយៈពេល០១ខែ។ស្ថានទូតបានឧបត្ថម្ភសំបុត្រយន្តហោះបង់ថ្លៃពិន័យជូនការិយាល័យអន្តោប្រវេសន៍ម៉ាឡេស៊ី ផ្តល់ការស្នាក់នៅ និងម្ហូបអាហារបរិភោភ ជូនពលការិនី។
ពលការិនី ទិត ទីម៉ះ បានទៅដល់ព្រលានយន្តហោះអន្តរជាតិភ្នំពេញ តាមជើងយន្តហោះ AK534 នៅថ្ងៃទី១២ ខែមិថុនា ឆ្នាំ២០១៧ វេលាម៉ោង ១៥:៥៥នាទី។ ស្ថានទូតបានចាត់មន្ត្រីជូនពលការិនីទៅព្រលានយន្តហោះអន្តរជាតិគួឡាឡាំពួរ និងអង្គការទេសន្តប្រវេសន៍អន្តរជាតិ (IOM) នឹងរង់ចាំទទួលនាងនៅព្រលានយន្តហោះអន្តរជាតិភ្នំពេញ ។