ឯកឧត្តម អ៊ូក សោភ័ណ ឯកអគ្គរាជទូតកម្ពុជាប្រចាំព្រះរាជាណាចក្រថៃ បានទទួលជួបក្រុមប្រឹក្សាធុរះកិច្ចថៃកម្ពុជា (TCBC) (នៃសភាពាណិជ្ជកម្មថៃ)

នៅរសៀលថ្ងៃទី ២០   ខែមីនា ឆ្នាំ ២០១៩ ជាកិច្ចឆ្លើយតបនឹងគោលនយោបាយការទូតសេដ្ឋកិច្ច របស់រាជរដ្ឋាភិបាលកម្ពុជាឯកឧត្តម  អ៊ូក  សោភ័ណ ឯកអគ្គរាជទូតកម្ពុជាប្រចាំព្រះរាជាណាចក្រថៃ បានទទួលជួបក្រុមប្រឹក្សាធុរះកិច្ចថៃកម្ពុជា (TCBC) (នៃសភាពាណិជ្ជកម្មថៃ) មានសមាសភាពពាណិជ្ជករចំនួន ៨រូប ដើម្បីសម្តែងការគួរសម ពិភាក្សាការងារជំរុញពាណិជ្ជកម្ម និងកិច្ចសហការទៅថ្ងៃមុខ។ បានផ្លាស់ប្តូរយោបល់ ពិភាក្សា និងឯកភាពនូវចំណុចសំខាន់មួយចំនួនដូចខាងក្រោម៖

– ស្វាគមន៍ការបន្តបណ្តាក់ទុន និងជំនួញនានានៅកម្ពុជា   និងការសម្របសម្រួលអោយមានការវិនិយោគពីខាងកម្ពុជាមកប្រទេសថៃលើផ្នែកសក្តានុពលមួយចំនួនដូចជាសំណង់ខុនដូរ អាហារដ្ឋាន ។ល។

– ក្នុងអំឡុងពេលមានកិច្ចប្រជុំនានា នៅថៃឆ្នាំ ២០១៩នេះ បន្តសហការរៀបចំអោយមានជំនួបរវាង ថ្នាក់ដឹកនាំក្រសួងសំខាន់ៗរបស់កម្ពុជា   និងក្រុមពាណិជ្ជករ  ដើម្បីជំរុញការរីកចំរើន សេដ្ឋកិច្ច ឧស្សាហកម្ម ពាណិជ្ជកម្ម  វិនិយោគ នៃប្រទេសទាំងពីរ។

– រៀបចំទទួលជួបបន្តក្រុមពាណិជ្ចករ វិនិយោគិនថៃធំៗ ដើម្បីជម្រាបអំពីឪកាសវិនិយោគ ដែលកម្ពុជាកំពុងមានសក្តានុពល និងស្វែងយល់អំពីតម្រូវការពាណិជ្ជកម្មនៅប្រទេសថៃ។

– បន្ថែមពីនោះ  ស្ថានទូត និងក្រុមប្រឹក្សាធុរះកិច្ច មានគម្រោង រៀបចំអោយចេញជារូបរាងនូវ ទស្សនកិច្ចពាណិជ្ជកម្មជំរុញទេសចរ  និងការដឹកជញ្ជូនតាមឆ្នេរសមុទ្រ និងទេសចរណ៍វប្បធ៌មតាមរយះការធ្វើសិក្ខាសាលានៅថៃ និងការអញ្ជើញអង្គទូតសំខាន់ៗទៅទស្សនកិច្ចនៅកម្ពុជា នៅពេលសមស្រប ក្នុងឆ្នាំ ២០១៩នេះ ។