ជំនួប​រវាង​ឯក​ឧត្តម​ទេស​រដ្ឋមន្ត្រី​ ប្រាក់​ សុខុន ​និង​ឯក​ឧត្តម​ Philippe Douste Blazy

នៅថ្ងៃទី ២៨ ខែ មិថុនា ឆ្នាំ ២០១៦ វេលាម៉ោង ១៦:៣០ នាទី នៅទីស្តីការក្រសួង ឯកឧត្តម ប្រាក់ សុខុន ទេសរដ្ឋមន្ត្រី រដ្ឋមន្រ្តី ការបរទេស និងសហប្រតិបត្តិការអន្តរជាតិ បានទទួលជួប ឯកឧត្តមPhilippe Douste Blazy អគ្គលេខាធិការរងអ.ស.ប អតីតរដ្ឋមន្ត្រី សុខាភិបាល និងជាអតីតរដ្ឋមន្ត្រីក្រសួងការបរទេសបារាំង។

ឯកឧត្តមទេសរដ្ឋមន្ត្រី ប្រាក់ សុខុន បានសម្តែងនូវការស្វាគមន៍យ៉ាងកក់ក្តៅចំពោះដំណើររបស់ឯកឧត្តម Philippe Douste Blazy មកកាន់កម្ពុជា ហើយវាយតំលៃថាជំនាញ បទពិសោធន៍ ការប្តេជ្ញាចិត្ត ព្រមទាំងមុខតំណែងបច្ចុប្បន្នរបស់ឯកឧត្តម គឺជាគុណវឌ្ឍ ដ៏ប្រសើរបំផុតសម្រាប់បេក្ខភាពនេះ។

ឯកឧត្តមទេសរដ្ឋមន្ត្រី ក៏បានវាយតម្លៃខ្ពស់ និងថ្លែងអំណរគុណចំពោះកិច្ចសហប្រតិបត្តិការដ៏ល្អរវាងកម្ពុជា និងបារាំង ពិសេសលើ វិស័យសុខាភិបាល ដោយឯកឧត្តមបានគូសបញ្ជាក់ពីការជួយឧបត្ថម្ភដ៏ច្រើនរបស់បារាំង ចំពោះកម្ពុជាលើផ្នែកនេះ ។

ឯកឧត្តម Philippe Douste Blazy បានជម្រាបជូនឯកឧត្តមទេសរដ្ឋមន្ត្រី នៅក្នុងដំណើរមួយមកកាន់តំបន់អាស៊ីប៉ាស៊ីហ្វីក ដើម្បីស្វែង រកការគាំទ្រសម្រាប់បេក្ខភាពរបស់ឯកឧត្តមផ្ទាល់សម្រាប់មុខតំណែងជាអគ្គនាយករបស់អង្គការសុខភាពពិភពលោក អំពីការតាំងចិត្តរបស់ឯកឧត្តមចំពោះការងារដែលត្រូវបំពេញនៅក្នុងអង្គការសុខភាពពិភពលោក

ពិសេសអំពីសិទ្ធិក្នុងការទទួលបាននូវសេវាសុខាភិបាលសម្រាប់គ្រប់ៗគ្នា និងការធ្វើប្រជាធិបតេយ្យភាវូបនីយកម្មសុខាភិបាលដែល នឹងផ្តល់ផលប្រយោជន៍ដល់ប្រទេសក្រីក្រក្នុងលោក។

ឯកឧត្តម Philippe Douste Blazy ក៏បានគូសបញ្ជាក់ជូនឯកឧត្តមទេសរដ្ឋមន្រ្តីអំពីការយកចិត្តទុកដាក់ និងការ ផ្តល់ សារៈ សំខាន់ របស់រដ្ឋាភិបាលបារាំងចំពោះអង្គការសុខភាពពិភពលោកនេះ។ ឯកឧត្តមក៏បានសំដែងការកោតសរសើរ ចំពោះជោគជ័យ ជាច្រើន ដែល កម្ពុជាសម្រេចបានក្នុងការប្រយុទ្ធប្រឆាំងជំងឺធំៗមាន អេដស៍ របេង និងគ្រុនចាញ់។

ឯកឧត្តមទេសរដ្ឋមន្ត្រី ក៏បានថ្លែងអំណរគុណចំពោះសមានចិត្ត និងការប្តេជ្ញាចិត្ត របស់ឯកឧត្តម Philippe Douste Blazy ហើយ បានគូសបញ្ជាក់ថា កម្ពុជាមានការពេញចិត្ត ហើយនឹងធ្វើការពិនិត្យពិចារណាដោយយកចិត្តទុកដាក់ ចំពោះបេក្ខភាពរបស់ ឯកឧត្តម Philippe Douste Blazy ។

ថ្ងៃទី ២៨ ខែ មិថុនា ឆ្នាំ ២០១៦