សេចក្តីប្រកាសព័ត៌មាន
- ខែវិច្ឆិកា 16, 2016
ស្ថានទូតកម្ពុជានៅម៉ាឡេស៊ី រៀបចំមាតុភូមិនិវត្តន៍របស់ពលការិនីខ្មែរ២នាក់
ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានជួយសម្របសម្រួលមាតុភូមិនិវត្តន៍របស់ពលការិនីខ្មែរ២នាក់៖
១- ពលការិនី ក.ខ អាយុ២៤ឆ្នាំ មានស្រុកកំណើតនៅខេត្តកំពង់ឆ្នាំង បានទៅធ្វើការតាមផ្ទះនៅម៉ាឡេស៊ី ពីថ្ងៃទី១៧ ខែវិច្ឆិកា ឆ្នាំ២០១៤ តាមរយៈជនជាតិម៉ាឡេស៊ីម្នាក់។ ពលការិនី បានទទួលប្រាក់ខែគ្រប់ចំនួន ប៉ុន្តែដោយសារម្តាយរបស់នាងមានជំងឺជាទម្ងន់ នាងបានទៅស្ថានទូតនៅថ្ងៃទី០១ ខែ វិច្ឆិកា ឆ្នាំ២០១៦ ស្នើជួយឲ្យបានត្រឡប់មកកម្ពុជាវិញ។ ស្ថានទូតបានចេញលិខិតធ្វើដំណើរ និងជូននាងទៅបង់ពិន័យនៅការិយាល័យអន្តោ-ប្រវេសន៍ម៉ាឡេស៊ី។
២- ពលការិនី ស.ស.ក អាយុ៣៦ឆ្នាំ មានស្រុកកំណើតនៅខេត្តកំពង់ចាម បានធ្វើដំណើរទៅម៉ាឡេស៊ី ជាលើកទី២ដោយខ្លួនឯង ហើយបានធ្វើការតាមផ្ទះ ពីថ្ងៃទី២៥ ខែកញ្ញា ឆ្នាំ២០១៤។ ពលការិនី បានទទួលប្រាក់ខែគ្រប់ចំនួន ប៉ុន្តែដោយសារការងារលំបាក នាងបានទៅស្ថានទូតនៅថ្ងៃទី០៧ ខែវិច្ឆិកា ឆ្នាំ២០១៦ ស្នើជួយឲ្យបានត្រឡប់ទៅកម្ពុជា។ ស្ថានទូតបានចេញលិខិតធ្វើដំណើរ និងជូននាងទៅបង់ពិន័យនៅការិយាល័យអន្តោ-ប្រវេសន៍ម៉ាឡេស៊ី។
ពលការិនី ក.ខ និងពលការិនីស.ស.ក បានមកដល់ព្រលានយន្តហោះអន្តរជាតិភ្នំពេញ នៅថ្ងៃទី១៣ ខែ វិច្ឆិកា ឆ្នាំ ២០១៦ វេលាម៉ោង០៧:៥០នាទីព្រឹក តាមជើងយន្តហោះលេខ AK 536 ។
អំឡុងពេលរង់ចាំមកកម្ពុជា ស្ថានទូតបានផ្តល់កន្លែងស្នាក់នៅ និងអាហារបរិភោគដល់ពលការិនីទាំងពីរនាក់ផងដែរ។
ភ្នំពេញ, ថ្ងៃទី ១៦ ខែ វិច្ឆិកា ឆ្នាំ ២០១៦