សេចក្តីប្រកាសព័ត៌មាន
- ធ្នូ ២៨, ២០១៦
មាតុភូមិនិវត្តន៍របស់ពលការិនីខ្មែរ៣នាក់ ពីប្រទេសម៉ាឡេស៊ី
ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានជួយដោះស្រាយបញ្ហា និងរៀបចំមាតុភូមិនិវត្តន៍របស់ពលការិនីខ្មែរចំនួន៣នាក់ ដូចខាងក្រោម៖
(១) ពលការិនី អ.ច.ណ អាយុ៣១ឆ្នាំ មកពីស្រុកអង្គស្នួល ខេត្តកណ្តាល បានទៅម៉ាឡេស៊ី ធ្វើការជាអ្នកបោសសំអាត ពីថ្ងៃទី២២ ខែមេសា ឆ្នាំ២០១៦ តាមរយៈក្រុមហ៊ុនមួយនៅកម្ពុជា។ ដោយធ្វើការលំបាក នាងបានស្នើស្ថានទូតនៅថ្ងៃ ទី២៤ ខែវិច្ឆិកា ឆ្នាំ២០១៦ ជួយឲ្យបានត្រឡប់មកកម្ពុជាវិញ។ ក្រោមកិច្ចអន្តរាគមន៍របស់ស្ថានទូត និយោជករបស់ពលការិនីបានយល់ព្រមប្រគល់ប្រាក់ខែដែលនៅសល់ និងលិខិតឆ្លងដែនជូននាងវិញ នៅថ្ងៃទី២៧ ខែធ្នូ ឆ្នាំ២០១៦ ។
(២) ពលការិនី ប.រ.ន អាយុ៣៦ឆ្នាំ មកពីខណ្ឌទួលគោក រាជធានីភ្នំពេញ បានចាញ់បោកមេខ្យល់ ទៅធ្វើការជាអ្នកបោសសំអាតនៅម៉ាឡេស៊ី ពីខែកញ្ញា ឆ្នាំ២០១៦។ ក្រោមកិច្ចអន្តរាគមន៍របស់ស្ថានទូត និយោជករបស់ពលការិនី បានយល់ព្រមឲ្យនាងទៅស្ថានទូត នៅថ្ងៃទី២២ ខែធ្នូ ឆ្នាំ២០១៦ ជាមួយនឹងប្រាក់ខែដែលនៅសល់ លិខិតឆ្លងដែន និងសំបុត្រយន្តហោះ។
ពលការិនី អ.ច.ណ និង ប.រ.ន បានមកដល់ព្រលានយន្តហោះអន្តរជាតិភ្នំពេញ នៅថ្ងៃទី២៨ ខែធ្នូ ឆ្នាំ២០១៦ វេលាម៉ោង០៧:៥០នាទីព្រឹក តាមយន្តហោះលេខ AK536 ។
(៣) ពលការិនី ស.ប.រ អាយុ២៨ឆ្នាំ មកពីស្រុកត្បូងឃ្មុំ ខេត្តត្បូងឃ្មុំ បានទៅម៉ាឡេស៊ីធ្វើការងារផ្ទះ ពីថ្ងៃទី១៥ ខែកុម្ភៈ ឆ្នាំ២០១៦ តាមរយៈក្រុមហ៊ុនមួយនៅកម្ពុជា។ ដោយធ្វើការលំបាក នាងបានស្នើស្ថានទូត នៅថ្ងៃទី៣០ ខែវិច្ឆិកា ឆ្នាំ២០១៦ ជួយឲ្យបានត្រឡប់មកកម្ពុជាវិញ។ ក្រោមកិច្ចអន្តរាគមន៍របស់ស្ថានទូត នៅថ្ងៃទី២៣ ខែធ្នូ ឆ្នាំ២០១៦ និយោជករបស់ពលការិនី បានយល់ព្រមប្រគល់ប្រាក់ខែដែលនៅសល់ ជូនដល់នាង។
ពលការិនី ស.ប.រ នឹងមកដល់ព្រលានយន្តហោះអន្តរជាតិភ្នំពេញ នៅថ្ងៃទី២៩ ខែធ្នូ ឆ្នាំ២០១៦ វេលាម៉ោង ០៧:៥០នាទីព្រឹក តាមយន្តហោះលេខ AK536 ៕
ភ្នំពេញ, ថ្ងៃទី ២៨ ខែ ធ្នូ ឆ្នាំ ២០១៦