សេចក្តីប្រកាសព័ត៌មាន
- ខែមករា 2, 2017
មាតុភូមិនិវត្តន៍របស់ពលរដ្ឋខ្មែរ៣នាក់ ពីប្រទេសម៉ាឡេស៊ី
ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី បានជួយដោះស្រាយបញ្ហា និងរៀបចំមាតុភូមិនិវត្តន៍របស់ពលរដ្ឋខ្មែរចំនួន៣នាក់ ដូចខាងក្រោម៖
– ពលរដ្ឋខ្មែរឈ្មោះ ស.ធ អាយុ៣៤ឆ្នាំ មកពីស្រុកកណ្តៀង ខេត្តពោធិ៍សាត់ បាននាំភរិយា និងកូនចំនួន៥នាក់ រួមទាំងកូនស្រីឈ្មោះ ធ.ល.ស អាយុ២ឆ្នាំ ទៅធ្វើការខុសច្បាប់នៅរោងចក្រផលិតប្លាស្ទិក តាំងពីឆ្នាំ២០១២។
នៅថ្ងៃទី២៦ ខែធ្នូ ឆ្នាំ២០១៦ ស្ថានទូតបានទទួលដំណឹងពីមន្ទីរពេទ្យមួយនៅម៉ាឡេស៊ី ថា កុមារី ធ.ល.ស បានព្យាបាលជំងឺរយៈពេលពីរខែ និងត្រូវបង់ថវិកាចំនួន៤០.០០០រីងហ្គីត (ប្រហែល១០.០០០ដុល្លារអាមេរិក) ប៉ុន្តែក្រុមគ្រួសារពុំមានលទ្ធភាពបង់គ្រប់ឡើយ។ ស្ថានទូតបានចាត់មន្ត្រីទៅសួរសុខទុក្ខ និងបានចរចាជាមួយមន្ទីរពេទ្យចំនួន៣លើក រហូតមន្ទីរពេទ្យបានយល់ព្រមបញ្ចុះតម្លៃឲ្យទាបបំផុត ចំនួនតែ៥.០០០រីងហ្គីត (ប្រមាណ១.០០០ដុល្លារអាមេរិក) ប៉ុណ្ណោះ។
ស្ថានទូតបាននាំពលរដ្ឋ ស.ធ និងកុមារី ធ.ល.ស ទៅស្នាក់នៅស្ថានទូតនៅថ្ងៃទី៣០ ខែធ្នូ ឆ្នាំ២០១៦ ហើយបានធ្វើលិខិតធ្វើដំណើរជូន និងសម្របសម្រួលជាមួយការិយាល័យអន្តោប្រវេសន៍ម៉ាឡេស៊ី។
អ្នកទាំងពីរ បានមកដល់ព្រលានយន្តហោះអន្តរជាតិភ្នំពេញ នៅថ្ងៃទី៣១ ខែធ្នូ ឆ្នាំ២០១៦ វេលាម៉ោង១៦:០០នាទី តាមជើងយន្តហោះ AK534។
– ពលការិនីខ្មែរឈ្មោះ វ.ស.វ អាយុ៣៤ឆ្នាំ មកពីខេត្តកំពង់ធំ បានធ្វើដំណើរទៅម៉ាឡេស៊ីខុសច្បាប់ដោយខ្លួនឯង និងធ្វើការងារតាមផ្ទះ ពីខែមករា ឆ្នាំ២០១៥។
ពលការិនី ត្រូវបាននិយោជកបរទេសចាប់រំលោភនៅរដ្ឋ Perak ហើយបានរត់តាមផ្លូវ និងត្រូវបាននគរបាលរដ្ឋ Perak ជូនទៅស្ថានទូតនៅថ្ងៃទី០១ ខែធ្នូ ឆ្នាំ២០១៦។ ស្ថានទូតបានស្នើអាជ្ញាធរម៉ាឡេស៊ីតាមចាប់ជនល្មើស ដើម្បីផ្តន្ទាទោសតាមច្បាប់។ ប៉ុន្តែអាជ្ញាធរម៉ាឡេស៊ី មិនអាចរកឃើញជនល្មើសទេ ដោយសារពលការិនីមិនចាំអាស័យដ្ឋានដែលនាងធ្លាប់ស្នាក់នៅឡើយ។ ពលការិនី បានសម្រេចស្នើសុំស្ថានទូតជួយឲ្យបានត្រឡប់មកកម្ពុជាវិញ។ ស្ថានទូតបានសម្របសម្រួលជាមួយការិយាល័យអន្តោប្រវេសន៍ ម៉ាឡេស៊ី និងឧបត្ថម្ភសំបុត្រយន្តហោះជូននាងផងដែរ។
ពលការិនី វ.ស.វ បានមកដល់ព្រលានយន្តហោះអន្តរជាតិភ្នំពេញ ថ្ងៃទី២៩ ខែធ្នូ ឆ្នាំ២០១៦ វេលាម៉ោង ០៧:៥០នាទីព្រឹក តាមជើងយន្តហោះ AK536 ។
ក្នុងអំឡុងពេលរង់ចាំត្រឡប់មកកម្ពុជាវិញ ស្ថានទូតបានផ្តល់ការស្នាក់នៅ និងអាហារបរិភោគ ជូនដល់ពលរដ្ឋខ្មែរទាំង៣នាក់ផងដែរ។
ភ្នំពេញ, ថ្ងៃទី ០២ ខែ មករា ឆ្នាំ ២០១៧