សេចក្តីប្រកាសព័ត៌មាន
- មករា ៣១, ២០១៧
សុន្ទរកថារបស់ឯកឧត្តមទេសរដ្ឋមន្រ្តី ប្រាក់ សុខុន ក្នុងពិធីចុះហត្ថលេខា លើ «កិច្ចសម្របសម្រួលក្របខ័ណ្ឌ ស្តីពីការផ្តល់ឥណទានសម្បទាននៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច» និង «កិច្ចសម្របសម្រួល ស្តីពីការផ្តល់ឥណទានសម្បទាន សម្រាប់គម្រោងលើកកម្ពស់គុណភាពផ្លូវជាតិ លេខ៤៨» ថ្ងៃទី ៣១ ខែមករា ឆ្នាំ២០១៧។
ឯកឧត្តម គីម វ៉ន ជីន ឯកអគ្គរដ្ឋទូតនៃសាធារណរដ្ឋកូរ៉េ ប្រចាំព្រះរាជាណាចក្រកម្ពុជា
ឯកឧត្តម ភ្ញៀវកិត្តិយស អស់លោក លោកស្រី
ថ្ងៃនេះ ឯកឧត្តម គីម វ៉ន ជីន តំណាងឲ្យរដ្ឋាភិបាលសាធារណរដ្ឋកូរ៉េ និងរូបខ្ញុំ ជំនួសមុខឲ្យ រាជរដ្ឋាភិបាលកម្ពុជា ទើបតែបានចុះហត្ថលេខាលើឯកសារសំខាន់ចំនួនពីរ គឺៈ
១- កិច្ចសម្របសម្រួលក្របខ័ណ្ឌ «ស្តីពីការផ្តល់ឥណទានសម្បទាននៃមូលនិធិសហប្រតិ-
បត្តិការអភិវឌ្ឍន៍សេដ្ឋកិច្ច សម្រាប់ឆ្នាំ២០១៦ ដល់ ២០១៨» ដែលមានទឹកប្រាក់ចំនួន៣៥០ លានដុល្លារអាមេរិក និង
២- កិច្ចសម្របសម្រួល «ស្តីពីការផ្តល់ឥណទានសម្បទាន សម្រាប់គម្រោងលើកកម្ពស់គុណភាពផ្លូវជាតិ លេខ៤៨» ដែលមានទឹកប្រាក់ចំនួន ៦៧.៤៣៤.០០០ ដុល្លារអាមេរិក។
មូលនិធិកិច្ចសម្របសម្រួលក្របខ័ណ្ឌនេះ នឹងត្រូវប្រើប្រាស់សម្រាប់ផ្គត់ផ្គង់ហិរញ្ញវត្ថុដល់ គម្រោងអាទិភាពនានា លើផ្នែកហេដ្ឋារចនាសម្ព័ន្ធ ប្រព័ន្ធធារាសាស្រ្ត សុខភាព ផ្លូវជនបទ និងប្រព័ន្ធលូបង្ហូរទឹក។ គួរកត់សំគាល់ជាសំខាន់ថា កិច្ចសម្របសម្រួលក្របខ័ណ្ឌនេះ គឺមានភាពស្របគ្នាយ៉ាង ល្អជាមួយវិស័យអាទិភាពនានា ដូចដែលបានកំណត់ឡើងដោយរាជរដ្ឋាភិបាលកម្ពុជា នៅក្នុងយុទ្ធសាស្រ្តចតុកោណដំណាក់កាលទី៣។
ចំពោះការសម្របសម្រួលដ៏ទៃផ្សេងទៀត គម្រោងនឹងត្រូវប្រើប្រាស់ដើម្បីធ្វើឲ្យប្រសើរឡើង ផ្លូវជាតិលេខ៤៨ ដែលលាតសន្ធឹងពីស្រុកស្រែអំបឹលទៅកាន់ខេត្តកោះកុង។ ការធ្វើឲ្យប្រសើរឡើងនេះ នឹងសម្រួលថែមទៀតដល់ការធ្វើដំណើររបស់ប្រជាជន ក៏ដូចជាទំនិញនៅតំបន់ភាគខាងត្បូង នៃប្រទេសកម្ពុជា។
ខ្ញុំសូមធ្វើការបញ្ជាក់ផងដែរថា ប្រាក់កម្ចីនៃកិច្ចសម្របសម្រួលរបស់មូលនិធីសហប្រតិបត្តិ-ការអភិវឌ្ឍន៍សេដ្ឋកិច្ច សម្រាប់ឆ្នាំ២០១៦ដល់២០១៨ មានកំណើនលើសពីរដង ពីកិច្ចសម្របសម្រួលក្របខ័ណ្ឌកន្លងមក (២០១៣-២០១៦) ដែលមានចំនួន២០០លានដុល្លារអាមេរិក។ ការកើនឡើងនេះគឺជាសក្ខីកម្មនៃការបន្តប្តេជ្ញាចិត្ត និងការគាំទ្ររបស់រដ្ឋាភិបាលសាធារណរដ្ឋកូរ៉េដល់រាជរដ្ឋាភិបាលកម្ពុជា ក្នុងកិច្ចប្រឹងប្រែងរបស់ខ្លួនក្នុងការអភិវឌ្ឍសង្គម សេដ្ឋកិច្ច និងការធ្វើឲ្យប្រសើរឡើងដល់សុខមាលភាពប្រជាជន។
ខ្ញុំសូមរំលឹកឡើងវិញថា ពីឆ្នាំ២០០១ ដល់ ២០១៦ សាធារណរដ្ឋកូរ៉េបានផ្តល់ប្រាក់កម្ចីពី មូលនិធីកិច្ចសហប្រតិបត្តិការសេដ្ឋកិច្ច ដល់កម្ពុជាមានចំនួនប្រហែល ៥៣៥លានដុល្លារអាមេរិក សម្រាប់ការអនុវត្តគម្រោងអភិវឌ្ឍន៍ចំនួន១៧។
ឆ្លៀតឱកាសនេះ ជំនួសមុខឲ្យរាជរដ្ឋាភិបាលកម្ពុជា ខ្ញុំសូមសម្តែងនូវអំណរគុណយ៉ាងស្មោះ ស្ម័គ្រដល់រដ្ឋាភិបាល និងប្រជាជននៃសាធារណរដ្ឋកូរ៉េ ចំពោះការគាំទ្រដល់ការអភិវឌ្ឍកម្ពុជា។ ខ្ញុំសូមថ្លែងអំណរគុណដល់ឯកឧត្តមឯកអគ្គរដ្ឋទូត គីម វ៉ន ជីន ចំពោះកិច្ចប្រឹងប្រែង និងការរួមចំណែក របស់ឯកឧត្តមដល់ការជម្រុញកិច្ចសហប្រតិបត្តិការ និងទំនាក់ទំនងទេ្វភាគីរបស់យើង។
ឆ្នាំនេះ ប្រទេសទាំងពីរនឹងប្រារព្វខួបអនុស្សាវរីយ៌លើកទី២០នៃទំនាក់ទំនង ការទូត ហើយខ្ញុំមានជំនឿចិត្តរឹងមាំថា ជាមួយកិច្ចប្រឹងប្រែងរួមរបស់យើង យើងអាចពង្រឹងថែមទៀតនូវទំនាក់ទំនងជាប្រពៃណី និងកិច្ចសហប្រតិបត្តិការផ្លែផ្កាសម្រាប់ផលប្រយោជន៍ទៅវិញទៅមករបស់ប្រទេសនិងប្រជាជនយើងទាំងពីរ។
សូមអរគុណ