សេចក្តីប្រកាសព័ត៌មាន
- ខែមីនា 29, 2017
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា នឹងអញ្ជើញធ្វើជាអធិបតីក្នុងពិធីចុះហត្ថលេខា លើហិរញ្ញប្បទានឥតសំណង នាថ្ងៃទី៣០ ខែមីនា ឆ្នាំ២០១៧។
នៅថ្ងៃទី ៣០ ខែមីនា ឆ្នាំ២០១៧ វេលាម៉ោង ១៦:០០ នាទីរសៀល នៅទីស្ដីការក្រសួងការបរទេស និងសហប្រតិបត្តិការអន្តរជាតិ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា នឹងអញ្ជើញធ្វើជាអធិបតីក្នុងពិធីចុះហត្ថលេខា ដូចខាងក្រោមៈ
-ឯកឧត្ដម ប្រាក់ សុខុន ទេសរដ្ឋមន្រ្ដី រដ្ឋមន្រ្ដីការបរទេស និងសហប្រតិបត្តិការអន្តរជាតិ និងឯកឧត្ដម ហូរីណូអ៊ុជិ ហ៊ីដេហ៊ីសា(HORINOUCHI Hidehisa) ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជា នឹងចុះហត្ថលេខាលើលិខិតប្ដូរសារ និងកំណត់ហេតុនៃការពិភាក្សាស្ដីពីការផ្ដល់ហិរញ្ញប្បទានឥតសំណង និងឥណទានសម្បទាន សម្រាប់គម្រោង ចំនួន០៤ ដូចខាងក្រោម៖
១- ហិរញ្ញប្បទានឥតសំណង ដែលមានទឹកប្រាក់សរុបចំនួន ១០៩ លានយ៉េន(ប្រមាណ៩៤៩.៩៧៣ ដុល្លារអាមេរិក) សម្រាប់អនុវត្តគំរោង «ធ្វើឱ្យប្រសើរឡើងនូវការការពារ ទឹកជំនន់ក្នុងរាជធានីភ្នំពេញ តំណាក់កាលទី៤»;
២- ហិរញ្ញប្បទានឥតសំណង ដែលមានទឹកប្រាក់សរុបចំនួន ១.៤៥៣ លានយ៉េន (ប្រមាណ១២,៦៦ លានដុល្លារអាមេរិក)សម្រាប់អនុវត្តគំរោង «ធ្វើឱ្យប្រសើរឡើងមន្ទីរពេទ្យបង្អែកខេត្តបាត់ដំបង»;
៣- ឥណទានសម្បទាន ដែលមានទឹកប្រាក់សរុបចំនួន ១១.១៣៦ លានយ៉េន (ប្រមាណ ៩៨ លានដុល្លារអាមេរិក) សម្រាប់អនុវត្តគំរោង «ការធ្វើឱ្យប្រសើរឡើងនូវកំណាត់ផ្លូវជាតិលេខ៥ ភាគខាងជើង (ក្រុងបាត់ដំបង-ក្រុងសិរីសោភ័ណ) ជំហានទី២» ; និង
៤- ហិរញ្ញប្បទានឥតសំណង ដែលមានទឹកប្រាក់សរុបចំនួន ៣.២៧១ លានយ៉េន (ប្រមាណ២៨,៥ លានដុល្លារអាមេរិក) សម្រាប់អនុវត្តគំរោង «ពង្រីកប្រព័ន្ធផ្គត់ផ្គង់ទឹកស្អាតក្នុងខេត្តកំពង់ធំ» ។
–ឯកឧត្តម អូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងឯកឧត្តម យូអ៊ីជី ស៊ូហ្គាណូ (Yuichi SUGANO) ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) នៅភ្នំពេញ នឹងចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការ ចំនួន០៣ ដូចខាងក្រោមៈ
ក-កិច្ចព្រមព្រៀងហិរញ្ញប្បទានឥតសំណងៈ ចំនួន០២ គំរោង ដែលមានទឹកប្រាក់ចំនួន
១.៥៦២លានយ៉េន គឺៈ
១)«ការធ្វើឲ្យប្រសើរឡើងនៃមន្ទីរពេទ្យបង្អែកខេត្តបាត់ដំបង» និង
២)«ការធ្វើឲ្យប្រសើរឡើងនូវការការពារទឹកជំនន់ ក្នុងទីក្រុងភ្នំពេញ ជំហានទី៤»។
ខ-កិច្ចព្រមព្រៀងឥណទានសម្បទានៈ ចំនួន០១គំរោង ដែលមានទឹកប្រាក់ចំនួន ១១.១៣៦ លានយ៉េន សម្រាប់«ការធ្វើឲ្យប្រសើរឡើងនូវកំណាត់ផ្លូវជាតិលេខ៥ ភាគខាងជើង (ក្រុងបាត់ដំបង-ក្រុងសិរីសោភ័ណ) ជំហានទី២។
ប្រទេសជប៉ុនគឺជាដៃគូដ៏សំខាន់បំផុតមួយរបស់កម្ពុជា ហើយបានរួមចំណែកជាច្រើនក្នុងការអភិវឌ្ឍសេដ្ឋកិច្ច សង្គម និងហេដ្ឋារចនាសម្ព័ន្ធនៅកម្ពុជា។ គំរោងទាំងនេះត្រូវបានរំពឹងទុកថានឹងជួយកែ លំអរដល់ការតភ្ជាប់តំបន់របស់កម្ពុជា ហើយធ្វើឲ្យប្រសើរឡើងដល់ជីវភាព និងការថែរក្សាសុខភាព របស់ប្រជាជន ការផ្គត់ផ្គង់ទឹកស្អាត និងការការពារទឹកជំនន់។
ភ្នំពេញ ថ្ងៃទី ២៩ ខែមីនា ឆ្នាំ២០១៧